Me samlar inn så lite som råd. Nettsida vår set ingen informasjonskapslar, og me sporar deg ikkje. Det einaste me tek vare på, er det du sjølv skriv inn i eitt av dei to verktøya våre.
Sist oppdatert 5. august 2026
Kven som har ansvaret
Lokalkontoret AS er behandlingsansvarleg for opplysningane som blir samla inn gjennom denne nettsida.
Lokalkontoret AS, org.nr. 931 407 899
Nikolaismauet 2, 5003 Bergen
info@lokalkontoret.no
97 96 97 61
Har du spørsmål om personvern, kan du skriva eller ringja rett til oss. Me har ikkje personvernombod, og treng det heller ikkje ut frå storleiken og verksemda vår.
Kva me samlar inn, og kvifor
Foreiningsjekken. Fyller du ut verktøyet på sida for foreiningar, tek me vare på e-postadressa di og det du oppgjev om foreininga: kva slag lag det er, kor mange medlemmer de har, kor stor eigenandel de rår over, om de har avtale om ein stad, og kvar de står i finansieringa. Me brukar det til å svara deg på om foreiningsmodellen passar for dykk.
Vegvisaren. Bed du om å få presentasjonen av arbeidsmodellen tilsend, tek me vare på namnet ditt, e-postadressa di og kva du valde i vegvisaren. Me brukar det til å senda deg presentasjonen og til å skjøna kva du er ute etter.
Grunnlaget for begge er at du sjølv har teke kontakt og bede oss om noko. I personvernforordninga heiter det artikkel 6 nr. 1 bokstav b: tiltak me gjer på di oppmoding før ein eventuell avtale.
Serverloggar. Som alle nettstader blir besøk logga hjå leverandøren som driftar sida. Loggane inneheld mellom anna IP-adressa, kva nettlesar du brukar og tidspunktet. Me brukar dei berre til å halda sida i drift og trygg, og me koplar dei ikkje mot deg som person. Grunnlaget er den rettkomne interessa vår i å driva ei fungerande og sikker nettside (artikkel 6 nr. 1 bokstav f).
Skjemaa for kontakt og nyhendebrev er i skrivande stund ikkje kopla til noko. Skriv du noko der, blir det ikkje sendt eller lagra nokon stad.
Ingen informasjonskapslar
Nettsida set ingen informasjonskapslar, og ho lagrar ingenting anna på eininga di heller. Me har ikkje analyseverktøy, ingen sporingspikslar og ingen knappar frå sosiale medium som følgjer deg vidare.
Alt du lastar ned når du er innom, kjem frå vårt eige domene. Kartet er teikna av oss, skrifta ligg på vår eigen tenar, og bileta frå Instagram er eit stille uttrekk utan kopling attende. Difor møter du heller ikkje noko samtykkevindauge her: det finst ikkje noko å samtykka til.
Kven andre som ser opplysningane
Me sel aldri opplysningar vidare, og me deler dei ikkje med andre enn dei to leverandørane me treng for å driva sida:
Vercel Inc. driftar nettsida og lagrar serverloggane.
Resend Inc. sender e-postvarselet til oss når du har fylt ut eit av verktøya.
Begge er amerikanske selskap, så opplysningane blir overførte ut av EØS. Overføringa kviler på standard personvernvilkår frå EU-kommisjonen, som er den vanlege ordninga for slik overføring.
Kor lenge me tek vare på det
Førespurnader frå foreiningsjekken og vegvisaren tek me vare på så lenge dialogen varer, og elles i høgda to år etter siste kontakt. Blir det eit oppdrag av det, følgjer opplysningane prosjektet og reglane for rekneskap.
Serverloggane hjå Vercel blir sletta automatisk etter kort tid, typisk nokre dagar.
Vil du at me skal sletta noko før det, held det å seia frå.
Rettane dine
Du har rett til å få vita kva me har lagra om deg, og til å få kopi av det. Du kan krevja at me rettar opplysningar som er feil, og at me slettar dei. Du kan be oss avgrensa kva me gjer med dei, du kan få dei utleverte i eit format du kan ta med deg til andre, og du kan protestera mot at me handsamar dei.
Send ein e-post til info@lokalkontoret.no, så svarar me innan ein månad. Det kostar ingenting.
Me tek ingen automatiske avgjerder om deg, og me driv ikkje profilering.
Klage
Meiner du at me handterer opplysningane dine feil, vil me helst høyra det frå deg først. Du kan uansett klaga til Datatilsynet, som er tilsynsstyresmakt i Noreg. Du finn kontaktinformasjonen deira på datatilsynet.no.
Endrar me denne erklæringa, oppdaterer me datoen øvst på sida.